បាត់ដំបង៖ រថភ្លើងដឹកទំនិញសង្ស័យដាច់កង់បណ្តាលឱ្យធ្លាក់ផ្លូវក្រឡាប់ទូកុងតឺន័រចំនួន២ទូសង្កត់ផ្ទះពលរដ្ឋចំនួន២ខ្នងរងការខូចខាត។ ប៉ុន្តែសំណាងល្អមិនបង្កគ្រោះថ្នាក់ដល់មនុស្សឡើយ។
ហេតុការណ៍នេះ បានកើតឡើងនៅវេលាម៉ោង ប្រហែល៥ទាបភ្លឺ ថ្ងៃទី១៣ ខែកុម្ភៈ ឆ្នាំ២០២៣ ស្ថិតក្នុងភូមិអណ្តូងចេញ សង្កាត់អូរចារ ក្រុងបាត់ដំបង។
ប្រភពនៅកន្លែងកើតហេតុបានប្រាប់ឱ្យដឹងថា នៅមុនពេលកើតហេតុគេឃើញរថភ្លើងមួយខ្សែ ផ្ទុកទំនិញនិងទូរកុងតឺន័រជាច្រើនទូ បើកបរដោយបុរសម្នាក់ក្នុងទិសដៅពីលិចទៅកើត។ លុះមកដល់ចំណុចកើតហេតុក៏ស្រាប់តែរថភ្លើងបានដាច់កង់ធ្លាក់តួចេញពីផ្លូវបណ្តាលឱ្យក្រឡាប់ទូកុងតឺន័រស្រូវចំនួនពីរទូសង្កត់ប៉ះលើផ្ទះពលរដ្ឋខូចខាតប៉ះពាល់ចំនួន២ខ្នងតែសំណាងល្អមិនមានគ្រោះថ្នាក់ដល់មនុស្សឡើយ។
ក្រោយពេលកើតហេតុខាងម្ចាស់ក្រុមហ៊ុនរថភ្លើងបានទាក់ទងយករថយន្តស្ទូចយកតួររថភ្លើង និងទូកុងតឺន័រឡើងដើម្បីយកទៅធ្វើការជួសជុល ចំណែកផ្ទះដែលរងការខូចខាតប៉ះពាល់ចំនួន២ខ្នងត្រូវបាន អភិបាលក្រុងបាត់ដំបង លោក លាង វាសនា ចាត់ឱ្យមេប៉ុស្តិ៍ធ្វើរបាយការណ៍ដើម្បីចុះជួយនៅពេលក្រោយ៕
